Suv resurslarini boshqarish raqamli asosga o‘tkaziladi

Prezidentning 15.08.2025 yildagi PQ-250-son qarori bilan O‘zbekiston Respublikasida suv resurslarini boshqarish va irrigatsiya sektorini rivojlantirishning 2025–2028 yillarga mo‘ljallangan dasturi tasdiqlandi.

Dastur maqsadli ko‘rsatkichlari:

• irrigatsiya tarmoqlarining 2 551 km qismini rekonstruksiya qilish, bu maqsadlar uchun har yili Davlat byudjetidan kamida 1,3 trln so‘m ajratish va xalqaro moliya institutlari mablag‘laridan 300 mln AQSh dollarini o‘zlashtirish;
• nasos stansiyalaridagi 562 ta nasos va 578 ta elektr dvigatelini zamonaviy energiya tejamkorlariga almashtirish;
• suv ta’minoti darajasi past bo‘lgan sug‘oriladigan maydonlarni 424 ming gektardan 276 ming gektargacha qisqartirish;
• 15 ta nasos stansiyasida muqobil energiya manbalarini o‘rnatish;
• suv tejovchi texnologiyalarni kengaytirish, sho‘rlangan maydonlar va sizot suvlarining yuqori sathli hududlarini kamaytirish;
• irrigatsiya va melioratsiya obyektlarini qurish va rekonstruksiya qilish orqali 67 ming gektar sug‘oriladigan yerlarni qayta foydalanishga kiritish.

Raqamlashtirish bo‘yicha chora-tadbirlar:

• muhim suv xo‘jaligi obyektlarida yagona onlayn hisob tizimini joriy etish, davlat chegarasida olinayotgan suv miqdorini kuzatish imkonini beruvchi kamida 300 ta raqamli suv o‘lchash qurilmasini o‘rnatish va ularni markazlashgan ma’lumotlar bazasiga integratsiya qilish;
• 12 080 ta meliorativ kuzatuv qudug‘ida suv sarfi monitoringini olib borish va 1 750 ta nasos agregatining suv sarfi hisobini yuritish;
• 12 ta yirik suv xo‘jaligi obyektini avtomatlashtirilgan boshqaruv tizimiga o‘tkazish;

* suv xo‘jaligi obyektlarini xususiy sektor boshqaruviga berish orqali DXSh obyektlarida xarajatlarni 15 %ga qisqartirish.

Shuningdek, suv resurslarini oqilona boshqarish, ulardan samarali foydalanish va muhofaza qilishni muvofiqlashtirish bo‘yicha Respublika suv kengashining tarkibi hamda uning asosiy vazifalari tasdiqlandi.

Mazkur hujjat Qonun hujjatlari ma’lumotlari milliy bazasida e’lon qilingan va 18.08.2025 yildan kuchga kirgan.